झापा, भद्रपुर। विश्व वातावरण दिवस–२०८२ को अवसरमा भद्रपुर नगरपालिका वडा नं. ९ स्थित प्रकाशपुर, पोकापाडा क्षेत्रको सडक किनारमा वृक्षारोपण कार्यक्रम गरी वातावरण दिवस भव्य रूपमा मनाइएको छ।
“प्लास्टिक प्रदूषण न्यूनीकरण : हाम्रो दायित्व” भन्ने मूल नारासहित आयोजित कार्यक्रममा भद्रपुर नगर प्रमुख गणेश पोखरेल, उप–प्रमुख राधा कार्की, प्रमुख प्रशासकीय अधिकृत सुनिल निरौला, नगर कार्यपालिका सदस्यहरू, डिभिजन वन कार्यालयका प्रतिनिधिहरू, समाजसेवीहरू, नगरका कर्मचारी, सुरक्षाकर्मीहरू र स्थानियवासीहरूको उल्लेखनीय उपस्थिति रहेको थियो।
कार्यक्रमको प्रमुख उद्देश्य वातावरण संरक्षण, हरियाली प्रवर्द्धन र प्लास्टिकजन्य प्रदूषण नियन्त्रणमा जनसहभागिता अभिवृद्धि गर्नु रहेको थियो। कार्यक्रममा विभिन्न जातका बिरुवाहरू रोपिएको थियो, जसले दीर्घकालीन रूपमा वातावरण सन्तुलन कायम गर्न सहयोग पुग्ने विश्वास गरिएको छ।
नगर प्रमुख गणेश पोखरेलले कार्यक्रममा सहभागी सम्पूर्ण व्यक्तिहरूप्रति आभार व्यक्त गर्दै, “वातावरणीय सन्तुलन र हरियालीको संरक्षण सबैको दायित्व हो। यस्तो अभियानमा नगरवासीहरूको सक्रिय सहभागिता अत्यन्त सराहनीय छ,” भन्दै आगामी दिनहरूमा पनि यस्ता कार्यक्रमलाई निरन्तरता दिइने प्रतिबद्धता जनाए।
भद्रपुर नगरपालिकाले वातावरणीय सचेतना अभिवृद्धि गर्दै वातावरणमैत्री नगर निर्माणमा यस्ता कार्यक्रमलाई प्राथमिकता दिने जनाएको छ।
